जनकपुरधाम । जनकपुरधामके पवित्र सरोवर गङ्गासागर स्थित नीयमीत होइत आएल महागङ्गा आरतीमे संयुक्त राज्य अमेरिकाके राजदूत सामेल भेलाह ।

महागङ्गा आरती शुरु भेल समय आइ आठवर्ष दू महिना २१ दिन पुंगल छै । जेष्ठ महिनामे गङ्गा दशहरा दिनस’ आरतीक आरम्भ मधेश प्रदेशक संसद रामआशिष यादव करौने छलाह । हुनके नेतृत्वमे सेफ द’ हिस्टोरिकल जनकपुर मादे दैनिक आरती क्रम जारी छै ।

आइ चैती दशहराक शुभ घडि़मे नेपाल स्थित अमेरिकी राजदूत डिनआर थामसॅन विशेष अतिथिक रुपमे सामेल छलाह । राजदूतक संग हुनक घरनी जेयान थामसॅन एवं दूतावासक दू दर्जन जतेक अधिकारी कर्मचारीसभ समेत आरती अवलोकनार्थ सामेल छलैथ ।

आजुक विशेष अवसर पर स्थानीय साउथ पोवाइन्ट स्कूलक छात्र छात्रासभ गङ्गा आरती पर आधारित सांगीतिक नृत्य नाटिका प्रस्तुत कएलक । स्कूल परिवारक नृत्य शिक्षक गुरु रामजी ठाकुरद्वारा तयार कएलगेल नृत्य प्रस्तुतिदेख राजदूत महोदय प्रशन्नता व्यक्त कएने छलाह ।

सनातन हिन्दु धर्मप्रति अमेरिकन राजदूत आस्थावान देखल गेल ओ आरती पछाइत चनामृत एवं प्रसाद ग्रहण समेत दुनु परानी कएलाह । आरतीक सञ्चालन एवं व्यवस्थापनकर्ता संसद रामआशिष यादव शाल गमछा ओढाक राजदूत दम्पतिकेँ स्वागत कएलाह ।

सेफ द’ हिस्टोरिकल परिवारके रवि गोयनका, अधिवक्ता राजकुमार महासेठ, उद्घोषक जोगेन्द्र ठाकुर एवं पुरोहितजन एवं अन्य अतिथिगणकेँ स्वागत कएलाह । आजुक आरतीमे भारत मुम्बईस’ सेहो विशेष लोक आइब सामेल भेल छलाह ।