सीमाञ्चल समदिया,
जनकपुरधाम । जन्मके आधार पर नेपाली नागरिकता प्राप्त लोककेँ सन्तानसभकेँ नेपाली नागरिकता शिघ्र प्रदान कएल जाए लेल स्थानीय प्रशासन कार्यालयकेँ आइयो घेराउ कएलगेल ।

समाजिकक्षेत्रमे कार्यरत् सोडेप नेपाल नामक संस्था अन्तर्गत कायम कएलगेल ‘जन सरोकार मञ्च’व्दारा जिला प्रशासन कार्यालय धनुषाके घेराउ कएलगेल छै । २०६४ सालमे नागरिकता विहिन लाखो लोककेँ जन्मके आधारमे सेहो नेपाली नागरिक्ता प्रदान कएल गेल छल ।

दू दशक पछाइत ओहन लोककेँ धीयापुता सेहो बालिग भगेल छै मुदा हुनकासभकेँ नेपाली नागरिकता दिअ पर रोक लागल छै । संबैधानिक अधिकार प्राप्त होइतो ऐन-कानुन नइ बनल रहलास’ अनागरिक रुपमे जन्मसिद्ध नागरिककेँ सन्तानसभ जीबैत आएल छै ।

नागरिकता नइ भेने कतहु कोनो काज लेल आवेदन नइ कसकैए, पासपोर्टे नइ बनाब सकैए, बिदेश कमाय नइ जासकैए, जग्गह जमीन नइ कीन बेसाहि सकैए, घर दुवार नइ बनाब सकैए ।

अइतरहें नागरिक अधिकारस’ लोक बञ्चित रहैत आएल छै । तैँ ओहन लोकसभकेँ जमात कायम कए जनसरोकार मञ्च चरणबद्ध आन्दोलन करैत आएल छै ।

स्थानीय प्रशासन मादे सरकारकेँ ध्यानाकर्ष कराक शिघ्रतास’ जन्मसिद्ध नागरिकता प्रापक सन्तानसभकेँ नेपाली नागरिकता प्रदान कएल जाय लेल बृहस्पतिदिन नगरमे प्रदर्शन करैत स्थानीय प्रशासन कार्यालयमे धर्ना घेराउ कार्यक्रम कएलगेल । ओ जनतब जनसेवक सत्यनारायण साह देलाह । चित्रसभःनागवंशी/सीमाञ्चल