सीमाञ्चल समदिया,
जनकपुरधाम । विकास निर्माणके काज नइ भेला पर नइ भेल कहैत आरोपित करैत लोक, स्वयं विकास काजकेँ भंगठाबैत छै । तेकर उदाहरण महोत्तरी जिलाके किछु स्थानमे देखल जासकैए ।

महोत्तरी जिलाके मटिहानी नगरपालिका अन्तर्गत सड़क-बाट निर्माण कएल भरौट माइट लोक खइनक लगेल छै । मटिहानी नपाके छोटका धिरापुरस’ सिमरदही-सारी जाएबाला पयरामे एहन नजारा देखल जासकैए ।

माइटस’ भैरक बनाओल गेल पयरा कातके माइट स्थानीयसभ लगेल छै । सडककातमे भैर-भैर छाबा धैर गहिंर खदिया खुइनक माइट काइटक लजाएब काज भेल देखल गेल छै ।

दियाबाती आ छैठसन महापर्व आबलागल छै । कच्ची घर रहल लोक माइटस’ लेबाइ मुनाई करैत छै । अपन घर-दुवार, देहरी-पछुती, ओलती-देबाल माइटस’ लेबब पोतबमे पयरा कातमे भरौठ चिकनीयाह माइट काइटक खुइनक स्थानीयसभ लगेल छै । वर्षा बुन्नी अएला पर एहे सड़क-बाट पैघ खदिहामे परिणत भजाएत से निश्चित बुझल जाए । तखनु पयरा चल जोकर पयरा नइ रैह जाएत । तखनु ओहो लोकसभ कहत मेयर किछु काजे नइ कएलक । नगरपालिका नरक बना देलक, कनिक माडियो नइ भरा देलकै सड़क पर ! एहन बिडम्बना तराई-मधेशके लोकबेदमे छै ।

गामके सभ लोक एना कएने पक्के नइ होइत ! किछु लोकके एहन गल्तीस’ सड़क कटान भेल छै । जाहिके बहुसंख्यक लोक रोइक नइ पौलक । तैँ समाजिक सचेतनाके दरकार छै । तखने विकास निर्माण काज दीर्घकाल धैर ठीक-ठाक आ दुरुस्त अवस्थामे रह सकैए । जेकर सरोकार सभस’ छै, ई जनबोध सभमे हुअ चाही ।

स्मरणीय बात ई छै अखनु विकास निर्माणके बहन्ने किछु राजनीतिक दल जनजाग्रण लाबके काजमे मटिहानीयोमे लागल छै । मुदा ओ सभ सेहो सामाजिक एहन कृप्रर्थाप्रति लोककेँ जागरुक नइ करबा रहल छै । सार्वजनिक सम्पति कोना आ कोन तरहें सुरक्षित राखक चाही जाहिपर समाजक सभकेँ अधिकार छै । ओहन जनभल लेल सोकजगर प्रयास कएल जवाए चाही ।