सीमाञ्चल समदिया,
जनकपुरधाम । आइदिनमे बारह एकबजेके ओनपोनमे एकझर कैसक बरसल । ओ बर्षामे नगरमे भेल बिकासी काजके पोल सेहो फेरस’ खुजल । चमकैत पीच सड़क आ भूतलमे बनल जलनिकास नालास’ जल निकासी नइ भेने सड़क पर जल जमकल रहल ।

जनकपुरधाम कार्डबोर्ड फेक्ट्रीलग कलवारी कुट्टीस’ सटले पुरुबारीकात द’क’ शान्तिनगर सरंचीयाकुट्टीदिस जाएबाला बीचबाटमे वर्षाके पानि जमकल छै । जमकल पानिमे बच्चाबुच्चीसभ सड़केके पोखरि बुइझक पानिमे उजाई-उजाई खेलब लेल उजबुझ भेल देखलगेल, जे चित्र पत्रकार सन्तोष कर्ण कैमरामे बन्न कएलाह ।

जनकपुरधामके निवर्तमान मेयर लालकिशोर साहके कार्यकालमे विकासी काज केहन भेल छै तेकर पोल आजुक झर्रीमे फेर खुजल छै । देख लेल जाए चित्रमे कनिके वर्षा भेला पर हुनक अपने निवास लगमे पानि जमकल छै ।

जाहिमे बौआ बुच्चीसभ स्नान करबमे लागल देखल जासकैए । अइ गड़बड़ीके सुधारबमे वर्तमान मेयर साहेब मनोजकुमार साह सेहो लगता ? गड़बड़ीयाह तथ्य उजागर कर्ता ?? जल निकासी हेतु सोकजगर प्रयास करता ??? की ई जड़ता ओहिना रहत ! ओ देखब बांकी छै ।

ओना नेपालीमे एकटा कहबी छै-‘‘जो जोगी आए कानै चिड़ेर गए’’ ! जनकपुरधाममे तेहने रबैया होएत आएल छै । तैँ वर्तमानो नेतृत्व कि ओहन रहत ओ अन्देशा लोकके भरहल छै ।